Antaŭ la juĝisto

El Vikifontaro
Jump to navigation Jump to search
Indekso : Antaŭ la juĝisto
de Daniel Fallström
Tradukita de Birjer Ström
El: Esperantisten 1-a jareldono, n-ro 6-7, junio-julio 1906.

"Post la konfes', knabin', ke donis vi
la morton al infan', en kaŝ' naskita,
defendon vian diru nun al ni,
ne spita kiel ĵus, sed submetita." -
"Se vi nur scius, kio movas sin
en senespera la patrina koro,
vi tiam certe ne ordonus min
ke submetiĝu mi en la doloro.

Ne multon diros mi, sinjor' ĵuĝist',
pri mia viv' kun ĉiuj la malbonoj
kaj la mizer'; sed notu vi, skribist',
ke koroj batas ankaŭ sub ĉifonoj.

En koto kreskis mi sen helpa man'.
Ne patron konis mi, sed ho! patrinon:
maldolĉa kiel la almoza pan'
malamo ŝia frapis la filinon.

En ia tag' forkuris mi de ŝi,
ekservis kaj penege laboradis,
sed dume kantoj de l' junec' al mi
en mian koron ĉiam revenadis.

Pro kulpo de l' junec' fariĝis mi
patrino; mia am' al li min igis.
Sed li, sinjor' altranga, kiel vi,
forlasis min - l'infanon mi dronigis.

L'infanon mi dronigis en la cel'
ke ne ekhavu ĝi la mian sorton;
plej bonan la donacon sub ĉiel'
al la infano donis mi: - la morton."