Bernardo el Clairvaux: Virga Patrino 4

El Vikifontaro
Salti al navigilo Salti al serĉilo

> Ĉefpaĝo:Esperanto
> Kategorio: Brevier-Legaĵo
> Sistema listo de ĉiuj Brevier-Legaĵoj
> Romkatolika Kalendaro

Brevier-Legaĵo[redakti]

el homilio de la sankta abato Bernardo el Clairvaux laŭde al la Virga Patrino

La tuta mondo atendas la respondon de Maria

Vi aŭdis, ho Virgulino, ke vi koncipos kaj naskos; vi aŭdis, ke ne el viro, sed el la Sankta Spirito. La anĝelo atendas respondon, ĉar li devas reiri al Dio, kiu sendis lin. Ni ankaŭ atendas, Sinjorino, vian vorton de kompato, ni, kiujn turmentas la sentenco de la kondamno. Jen estas oferita al vi la prezo de nia elaĉeto; tuj post via konsento ni estos liberigitaj. La eterna Vorto de Dio kreis nin ĉiujn, sed jen, ni mortas; via mallonga respondo renovigos nin, ni reviviĝos. Petas tion, ho afabla Virgulino, la kompatinda Adam, forpelita el Eden, kun sia kompatinda idaro; petas tion Abraham, petas David. Arde tion sopiras ĉiuj ceteraj sanktaj patroj, viaj patroj, kiuj ankaŭ loĝas en la ombro de morto; atendas tion la tuta mondo surgenue ĉe viaj piedoj.

Kaj ne malprave. De via vorto ja dependas la konsolo por bedaŭrinduloj, la elaĉeto por arestitoj, la liberigo por kondamnitoj kaj finfine la savo por ĉiuj infanoj de Adam, de tuta via gento.

Ho Virgulino, ne prokrastu vian respondon. Respondu rapide al la anĝelo, jes, pere de la anĝelo al Dio mem. Diru la vorton kaj akceptu la Vorton: diru vian vorton kaj koncipu la Dian Vorton, prononcu la paseblan vorton kaj brakumu la Vorton eternan.

Kial vi atendas? Kion vi timas? Kredu, konfesu kaj koncipu. Al la humileco aldonu kuraĝon, al la hontemo fidon. Nun neniel taŭgas, ke virga modesteco vualu la saĝecon. Ho, sankta Virgulino, ne timu riski en tiu unusola okazo, ĉar eĉ se hontemo esprimiĝas plaĉe en silento, nun estas pli necesa la sindona vorto.

Beata Virgulino, malfermu vian koron al la kredo, viajn lipojn al la konfeso kaj vian sinon al la Kreanto. Jen tiu, kiun ĉiuj nacioj atendas,[1] frapas ekstere la pordon. Se vi hezitos, li foriros kaj vi denove komencos dolore serĉi tiun, kiun amas via animo.[2] Leviĝu kredeme, kuru sindone, malfermu per via plena konfeso!

Kaj ŝi diris: «Jen la sklavino de la Eternulo, estu al mi laŭ via diro.» [3]

  1. Ĥag 2,8 (Vg.)
  2. kp. Kan 3,3
  3. Luk 1,38

Fontoj[redakti]

  • Latina teksto:
Bernardo el Clairvaux († 1153): Homilia (in Laudibus Virginis Matris) 4, 8-9
en: Sancti Bernardi opera, ed. Leclercq/Rochais, vol. 4, Romo 1966, 53-54
  • Esperanta traduko:
Alojz Dlugi SJ, 2000
2001 en Eichkorn: Liturgio de la Preĝ-Horoj, p. 71-72

Envicigo[redakti]

  • Advento > la 20-a de decembro

Vidu ankaŭ[redakti]

Ireneo: Kontraŭ Herezoj, lib. 3, ĉap. 20 (advento > la 19-a de decembro)
Ambrozio: Luko-Komentario (advento > la 21-a de decembro)