Kie vi estas...

El Vikifontaro
Iri al: navigado, serĉi
Melankolio Indekso : Kie vi estas... (1912)
de Eska
Kial mi kantas
Aperis en Unuaj agordoj.


Kie vi estas, ho, revo mia?
Kun vi mi vivis en mond' alia,
       For de dolor';
En la momento de la malĝojo
Vi ĉiam estis sur mia vojo,
       En mia kor'.
Dum somertagoj la belaj, sunaj,
Dum pluvaj, ploraj tagoj aŭtunaj
       Aŭ dum sufer',
Se vanan vivon mi jam malbenis,
En tiu mondo nur vi min tenis,
       Via esper'.
Sed malaperis vi kvazaŭ vento,
Kaj post vi restis en kor' nur sento
       De la sopir'.
Nun persekutas min malbonsorto,
Kaj ĝi jam restos kun mi ĝis morto
       En ĉiu spir'.
Nenia celo, dezir' nenia
Troviĝas nune en vivo mia
       Ĉar revoj for,
Nune mi vivas vane, sencele,
Kaj de sopiro ege, kruele
       Krevas la kor'.