La arbo de l' espero

El Vikifontaro
Jump to navigation Jump to search
Anĝelet' aŭ diableto Indekso : La arbo de l' espero
de Martinez de la Rosa
Tradukita de Antoni Grabowski
El Parnaso de Popoloj
Aŭtuna kanto
La arbo de l' espero
elhispanigis Antoni GRABOWSKI

 Al pié nace de una cuna
 El árbol de la esperanza

Elkreskas arbo de l' espero
Ĉe la lulilo de l' infano,
Laŭ vent-ekblovo balancate,
Rompebla kiel trema kano.

Per feliĉeco ĝin karesas
Zefiro dolĉa dum momento;
Tuj ĝin sekigas vent' el nordo
Aŭ suda ĝin bruligas vento.

Nur tre malofte maturiĝas
La frukto el floraro ĉarma;
Kiele frua migdal-floro
Pereas dum maten' malvarma.

Pli alten kiom ĝi leviĝas,
Des pli minacas ĝin danĝeroj;
Kiele cedro altekreska
Alvokas fulmojn el eteroj.

Ripozas aglo la fiera
En ĝia verda pinto alte,
Dum la insektoj-perfiduloj
Malsupre mordas ĝin senhalte.

Profunden iras la radikoj,
For etendiĝas ĉiu branĉo —
Apenaŭ arbo donas ombron,
Faligas ĝin de l' mort' ektranĉo.