La kroneto

El Vikifontaro
Jump to navigation Jump to search
Kozako en stepo Indekso : La kroneto (el la Kralodvora Manuskripto)
Tradukita de Antoni Grabowski
El Parnaso de Popoloj
La kvar fontoj
La kroneto
elĉeĥigis Antoni GRABOWSKI

 Vêje vêtr'ieĉek z knieżeckych lesóv
 Bêże zmilitka ku potoku.

De l' arbaro princa
Blovas la venteto;
La knabino kuras
Al la rivereto.

Kiam per siteloj
Akvon ŝi ekprenas,
Sur ŝaŭmanta ondo
Florkroneto venas.

Bela la kroneto,
Dolĉa la odoro:
De la violetoj,
De la roza floro.

— "Diru, ho floretoj,
Kiu, en mateno,
Plantis vin en molan
Teron de l' ĝardeno?

Mia don' al tiu,
Ho kroneto flora,
Estus la brilanta
Mia ringo ora.

Diru, ho kroneto,
Kiu, en mateno,
Ŝiris la floretojn,
Ligis per fadeno?

Mia don' al tiu,
Ho kroneto kara,
Estus la plej bela
Mia pinglo hara.

Diru, ho kroneto,
Kiu, en vespero,
Ĵetis vin en klaran
Akvon de l' rivero?

Donus mi al tiu,
Donus mi doneton:
De la kapo mia
Rozan la kroneton."

La knabino kaptas
La kroneton ĉarman, —
Falas, ha! en akvon
Falas ŝi malvarman.