La rompita vazo

El Vikifontaro
Salti al navigilo Salti al serĉilo
Rodika Indekso : La rompita vazo
de Sully Prudhomme
Tradukita de Antoni Grabowski
El Parnaso de Popoloj
Ruĝobuŝa knabineto
La rompita vazo
elfrancigis Antoni GRABOWSKI

 Le vase, où meurt cette verveine,
 D'un coup d'éventail fut fêlé.

La vazon, kie mortas la verben',
Per ventumilo ies man' ekfendis;
La bat' apenaŭ tuŝis ĝin, ĉar jen
Nenia bru' resone sin etendis.

Sed la fendeto, tiel delikata,
Kristalon ĉiutage pli mordante,
Sur sia vojo certa, nevidata,
Rondiris malrapide, sed konstante.

La freŝa akvo gutis for silente,
La suko de la flor' elĉerpis sin;
Neniu ĝin supozas ĉi-momente,
Rompita estas, do ne tuŝu ĝin!

Simile man' amata, iafoje,
La koron tuŝetante, ĝin ekfendas;
La koro poste krevas, kaj malĝoje
La flor' de l' amo pereante plendas.

Por mond-okuloj restas ĝi senvunda;
Sed ĉiam kreskas, kun mallaŭta plor',
Vundeto delikata kaj profunda,
Ne tuŝu ĝin — rompita estas kor'!