Lasta Kiso

El Vikifontaro
Iri al: navigado, serĉi
Indekso : Lasta Kiso
de Edmond Privat

Lasta Kiso

Vi kien flugas, papilio,
   tremante kaj rapide?
Jam mortis rozo kaj lilio,
   kaj venas frost’ perfide.

Flugilo viaj kvazaŭ lampo
   briletas en nebulo:
vi kion serĉas tra la kampo,
   perdita somerulo?

Dezertaj estas la ĝardenoj,
   kaj vana l’ amo via.
Skeletoj ŝajnas la verbenoj
   sub laŭbo senfolia.

Vi kial flugas en malvarmo
   tra flora la tombejo?
Sur ĉiu loko pluva larmo
   nun restas en herbejo.

Silentas ĉiuj en la nestoj
   kaj svenis bonodoroj;
plu ne batalos vi kun vespoj
   pri la floretaj koroj.

Jen restas nur en kampo vasta
   velkinta krizantemo,
sur kiu kiso via lasta
   mortigos vin en tremo.