Literatura Mondo/N.1/Maud

El Vikifontaro
Jump to navigation Jump to search
Popolkanto Indekso : Literatura Mondo/N.1
de Tennyson
Tradukita de Kalman Kalocsay
Maud
Recenzo: Edmond Privat — Vivo de Zamenhof

Tra la parko vokis la
Birdoj en ĥoro:
Kie estas Maud, Maud, Maud
Sonis kun ploro.

Kie Maud? Ja kun mi!
Sur la boskvojo
Ŝiris kaj plektis ŝi
Florojn kun ĝojo.

Sonis tra l'parko la
Vokoj kaj krioj:
Kie ŝi? Jen, jen, jen,
Inter lilioj.

Kisis mi, lasis ŝi.
Vango radia,
Nur deksesjara, sed
Alta beltalia.

Volus mi krii en
Ĝojo fiera.
Kor' ŝia: mia jam!
Graco ĉiela!

Pro ŝia danca ir'
Kaptis min miro,
Herboj freŝiĝis post
Ŝia trairo.

Birdoj en parko ja
Pro ŝi ploradis
Kie estas Maud, Maud, Maud
Iu ŝin svatis.

Gratas ĉevalo kaj
Henas ĉe l' pordo.
Ne vin elektis ŝi,
Iru for, lordo!

laŭ la angla: K. de KALOCSAY