Ĉi tiu paĝo estis validigita
AKTO II
SCENO I
Ĉambro en la domo de Polonio. Eniras Polonio kaj Reinhold.
Polonio
Jen tiujn ĉi paperojn kaj la monon
Al li transdonu!
Reinhold
Jes, sinjoro, bone.
Polonio
Sed antaŭ ol viziti lin, vi faros
Prudente, se vi bone eldemandos
Pri la konduto lia.
Reinhold
Efektive,
Mi mem intencis tion fari.
Polonio
Bone!
Tre bone! Antaŭ ĉio vi demandu,
Kielaj Danoj loĝas en Parizo,
De kia speco, kiel ili vivas,
Kun kiu kaj en kiaj societoj;
