Klara Zamenhof

by Otto Flatauer

Indekso : Klara Zamenhof (1925) de Otto Flatauer

Publikigita en Germana Esperantisto, n-ro 1/1925.

Klara Zamenhof

Nun sekvis al la Majstro la Majstrino —
„Majstrino!” oni rajte nomas ŝin;
Laciĝis eĉ la Majstro — ĉiam lin
Denove kuraĝigis la edzino.

De l’ Majstro belan kaj genian verkon —
Ŝi zorge traktis ĝin per mola man’,
Kaj kvazaŭ estus ŝia korinfan’:
Ŝi helpis flegi la eternan kverkon.

Kaj plej grandegan benon de patrino,
Ja, Klara Zamenhof, ricevis vi:
„Infano via estos mondreĝino!”
Al vi jam vivan gloron montris Di’;
Vi mortis radiante pro feliĉo. —
„L’ infano vivu!” estu la dediĉo.