Nova disko
Ĵus aperis disketo kun du kantoj, “Sven kaj Siv” kaj “Vivu la stel’”. Tiu lasta estas sufiĉe — pli ol sufiĉe, miaguste — konata, ŝimverda kanzono, sed “Sven kaj Siv” estas tute nova, verkita de la kantisto, Reine Svensson, originale en la sveda lingvo. La kanto rakontas tipan tagon de tipa laboranta virino en Svedujo (kaj ne nur tie), kie edzino laboras eksterhejme same kiel la edzo, sed tamen retenas pli-malpli plene la dommastrumajn devojn: “Nur eblas al virino elteni tian vivon”. La traduko havas kelkajn stilajn kaj ritmajn manketojn, sed la kantado kaj fona muzikado estas altnivelaj. Salutinda iniciato de Märtha Andreasson kaj Esperanto-Klubo Kungälv!
La disko estas havebla de la eldoninto, Esperanto-Disko AB, 2265, S-425 90 Hisings Kärra, Svedujo (12,50 svedaj kronoj — en Svedujo 15,00 kr. — plus sendokostoj), kaj de la libroservo de UEA (3,40 gld. plus sendokostoj).