Elektitaj Poemoj de Heinrich Heine/Kie?

by Heinrich Heine

Paco

Indekso : Elektitaj Poemoj de Heinrich Heine de Heinrich Heine Tradukita de Friedrich Pillath Kie?

Kie, laca pilgrimanto,
Fine ripozados mi?
Ĉu sub palm' en suda lando,
Aŭ ĉe Rejno sub tili'?

Ĉu per sablo mi kovrita
Kuŝos apud ocean',
Aŭ, malzorge enigita,
En dezert' ― per fremda man'?

Kie ajn! Min ĉirkaŭprenos
Ĉie la ĉiel' de Di',
Kun funebra lum' sin tenos
Nokte steloj super mi.