Fundamenta Krestomatio (1903)/Nokta kanto de soldato

by Ludwik Lejzer Zamenhof

Al la reĝo

Indekso : Fundamenta Krestomatio de Ludwik Lejzer Zamenhof Nokta kanto de soldato

Kanto de l'ligo

Nokta kanto de soldato

(De W. Hauff.)

En nigra nokto tute sole
Mi staras gardon senparole,
Eraras for la penso mia
Al mia domo familia.

Al la standardo fortirita,
Ho, kiom estis mi kisita . . .
Mi tiam pensis kun malĝojo :
Mi vidas vin je l' lasta fojo!

Ho dormu dolĉe, karaj miaj!
Irante al la litoj viaj,
Vi nun per preĝo Dion gloras,—
Vi certe ankaŭ min memoras.

La horo venis, gard' alia
Stariĝos nun sur loko mia.
Mi iras dormi tute laca,
Mi vidos vin en sonĝo paca.

L. ZAMENHOF.