Prologo/Paraleloj

Prologo (1929)

de Eŭgeno Miĥalski

Sennacieca Asocio Tutmonda (p. 29-30)

Elŝuti kiel:

Paraleloj

---

I	II
...Novo — malnovo,	Edeno — infero,
eterno — momento,	kompato — kruelo,
potenco — senpovo,	beato — sufero,
feliĉo — turmento.	mildeco — ribelo.

III	IV
Revado — konfeso,	Amemo — pasio,
timemo — arogo,	hontemo — senĝeno,
memoro — forgeso,	tuteco — nenio,
vereco — mensogo.	libero — kateno.

V	VI
Kareso — insulto,	Adoro — malamo,
konfido — ĵaluzo,	promeso — ĵurrompo,
konstanto — adulto,	trankvilo — ekflamo,
sincero — amuzo.	fidelo — fi-trompo.

VII	VIII
Trotakso — banalo,	Modero — senbrido,
diigo — profano,	tolero — postulo,
vizio — realo,	kolombo — aspido,
anĝelo — satano.	sindono — spekulo.

IX

Naturo — komerco,

pureco — malĉasto,
malsperto — ekzerco,
similo — kontrasto.

X

Ekflugo kaj falo,

heroo kaj vermo,
espero — fatalo,
naskiĝo — ekstermo.

Jen estas varioj de l’ amo —
burlesko kaj dramo!

Saratov, 5 Aŭgusto 1918.