Fundamenta Krestomatio (1903)/La rozeto

by Ludwik Lejzer Zamenhof

La vojevodo

Indekso : Fundamenta Krestomatio de Ludwik Lejzer Zamenhof La rozeto

En nord' unu pino...

La rozeto

(El Goethe.)

Knabo vidis — jen rozeto
Sur la kampo staras;
Bela, juna la floreto . . .
Vive kuras la knabeto,
Ĝojas, miras, flaras.
Sur la kampo la rozet'
Kiel infanet'.

Knabo diris : "mi eltiros
Belulinon mian";
Floro diris : "vi foriros, —
Per pikiloj mi disŝiros
Tuj la manon vian".
Sur la kampo la rozet'
Kiel infanet'.

La sovaĝa knab' ridante
La rozeton prenis, —
La floreto batalante
Sin defendis pikadante,
Sed la sorto venis.
Sur la kampo la rozet'
Kiel infanet'.

L. ZAMENHOF.