Sonoj Esperantaj/Kial paliĝis tiele rozoj

El Vikifontaro
Salti al navigilo Salti al serĉilo


8.

Kial paliĝis tiele rozoj?…
Parolu, ho karulin’!…
Kial en verda herbo violoj
Silentis kaj kaŝis sin?!…

Kial fariĝis tiele plenda
La kanto de najtingal’?
Kial sin levas odor’ mortula
De ĉiuj floroj en val’?…

Kial rigardas suno sur montoj
Malvarme kaj kun koler’?
Kial similas al muta tombo,
Aŭ al dezerto la ter’?…


Kial mi mem malsana, malĝoja,
Iras sur voj’, amatin’?!…
Diru, plej kara, pleje aminda,
Kial forlasis Vi min?!…



La teksto estas publika havaĵo (public domain). Detaloj pri la licenco troviĝas ĉe la paĝoj de la aŭtoro: Heinrich Heine kaj de la tradukinto: Leo Belmont.